ni:ara castillo moises
"Pag-ibig pag pumasok sa puso ninuman,"
"Hahamakin ang lahat masunod ka lamang!"
Yan ang kasabihang pinanghahawakan,
Nang mga pusong umiibig at hibang.
Taong umiibig bulag ang kahambing,
Lahat susundin animo alipin,
Laging sinasambit kahit pa magdildil,
Maduling man sa gutom,maligaya pa rin!
Walang pinipili pangit o maganda,
Kung minsan pagmasdan,nakakatawa,
Kahit masaktan tuloy pa rin ang laban,
Wari'y isang sundalong sa gyera'y sugatan.
Lumpo na ay pilit pa ring tumatayo,
Maipakita lamang tunay ang pagsuyo,
Ngunit di maiwasan ang iba maliko,
Umiyak man ng labis tanggapin pagkabigo.
Ngunit ang pag-ibig pag nadama'y anong sarap,
Parang nasa langit idinuduyan sa ulap,
Hindi mapipigil harangan man ng sibat,
Pagkat alipin na ng pusong nakabihag.
Mayroong pag-ibig matalim,masakit,
Iwasan man ito humihiwa,mapait,
Mahulog sa isang gahaman at ganid,
Luluha ng dugo,masasadlak sa putik.
Pagkaminsan pag-ibig dulot ay gulo,
Maari bang ilagan pagpana ni kupido,
Pagpana pagkaminsan ba't sa maling tao,
Masalimuot,dakila,nasaan ka dito?
Napagtantong sa pag-ibig umiikot ang mundo,
Nagdulot man ng pasakit o ligayang totoo,
Masarap ang umibig at ibigin ng puro,
Kahit pagkaminsan dulot ay pagkatalo!
Jan,14,2012
No comments:
Post a Comment