MASKARA

MASKARA
ni:ara castillo moises

Panlabas na katangiang nakakatangay,
Sa bawat pagkilos kayhinhin ngang tunay,
Kayraming naaakit sa matang mapupungay,
tinig na kaylamig nakapapawi ng uhaw.

Kayrami ang sa kanya naaakit,
Tila isang anghel na bumaba sa langit,
Puti yaring suot,sadyang kaylinis,
Ikinukubli dito,taglay nyang putik.

Bulaklak may taglay na bango't alindog,
Halimuyak sa gabi'y pumapaimbulog,
Ang bawat talulot pinitas sumabog,
Tinik na taglay,sa puso'y tutuhog.

Animo isang kay-among tupa,
Kaygaling magpanggap,isa palang sawa,
tunay na balat hindi maipakita,
Daig pa ang isang berdugo sa selda.

Kunwari ay bukal sa kapwa pagtulong,
Sa kaloob-looban,iba ang nilalayon,
Kundi pansariling nasa ang tuon,
Pagtalikod naman ay bubulung-bulong.

Dito nga sa mundo iba-iba ang tao,
Kung ikay isang mangmang talong sigurado,
Halos yata lahat mula sa ugat ni Plato,
Pawang mga paham,lahat matatalino.

Hwag kang pabubulag sa nakikita ng mata,
H'wag kang padadaig sa naririnig ng tenga,
Di lahat ng banal sa simbahan nakatira,
Bat mo pa sinamba,may sungay na pala?

Punyal kong dala di sadyang maihagis,
Makapagsalita man ako ng pangit at tambis,
Mayroon mang tamaan o hiwa'y dumaplis,
Maskara mong suot tiyak lilislis.

Maamo niyang mukhang ubod ng ganda,
Sa paningin ng iba akala mo dyosa,
Ngiting sumisilay huwad lang pala,
Lahat nakatago sa likod ng maskara!


Jan.16,2012
09:52PM/PHL