ISANG PASASALAMAT

Ako'y simpleng babaeng sa Nueva Ecija nagbuhat;

Kabukiran ang paligid at sa hirap namulat;

Di ikinahihiyang sa lahat ng bagay ay salat;

Buhay na bigay sa akin lubos na ang pasasalamat.

Pagsubok sa buhay ko pilit kong nilalabanan;

Tanging sarili lamang ang magiging sandigan;

dito sa mundong puno ng kahirapan;

Kimkim sa dibdib hirap ng kalooban.

Sa internet nilibang aking kalungkutan;

Nakatagpo dito mga tunay na kaibigan;

Sinabi sa sarili di pa rin ako pinabayaan;

Ng Panginoon sa itaas na lagi kong tinatawagan.

Mga kaibigan kinasangkapan upang maging daan;

Sa una nag-akalang puro lang kasinungalingan;

Dito sa networking akin ngang napatunayan;

May mga tao pang katulad nya likas ang kabutihan.

Ito'y nagsimula buhat ng aking matunghayan;

Paanyaya ng kaibigan sa patimpalak na sinalihan;

Ako'y nabighani sa layunin ng may kaarawan;

Nasabi sa sarili"sa problema ko ito na ang kasagutan".

Di man ako bihasa sa pagkatha ng tula;

Kahit anong hirap sa paghabi ng salita;

Araw gabi nagsulat..utak ko ay piniga;

Nakabuo ng tulaing halos may dalawampu na yata.

Ako'y nagpapasalamat sayo Bb.FLORENCE CALICA;

Sa halagang ipinagkaloob,nasa kamay kong biglang-bigla;

Sa pamamagitan ng kinatha kong mga tula;

kabaitang pinamalas mo,di matutumabasan ng papuri at salita.

Halagang mula sa'yo aking pinasasalamatan;

Labis ang naitulong sa taglay kong kahirapan;

Di maipaliwanag labis kong katuwaan;

Sa maliit na paraan ginawa itong puhunan.

Sa patimpalak na ginanap di man ako ang palarin;

Sa pihikang puso mo di ko nakayang hulihin;

Sa mga tulaing kinatha ko tangi na lamang mitihiin;

Nang baguhang tulad ko ikaw lang ay pangitiin.

Sa darating mong kaarawan isa lamang ang hiling;

Kaligayahang ninanasa sa'yo na sana ibaling;

Kung may kakayahan sanang sayong dako makarating;

Lubos ang kasiyahan kong makasama ka sa isang piging.

Tanging pagbati lamang sa puso ko nagbuhat;

Lahat na ng papuri nabigkas na nilang lahat;

Tanging masasambit Bb.FLORENCE ..SALAMAT!

Pasasalamat na mula sa akin...sa pamamagitan ng panulat.

Panulat na nabuhay ng di sinasadya;

Karunungang nakatago...sa pahina nailathala;

Salamat sa iyo Bb.FLORENCE CALICA;

Dahil sa iyo isinilang...isang makabagong makata.